Kryetari i komunës së Podujevës, Shpejtim Bulliqi, ka pritur sot në takim Mirela Lavric, drejtoreshën ekzekutive të OJQ-së Concordia, e cila merret më edukimin dhe mbështetjen e fëmijëve, familjeve dhe grupeve të margjinalizuara drejt një jete më të mirë, të pavarur dhe të dinjitetshme.
Drejtoresha Lavric ka njoftuar kryetarin Bulliqi për aktivitetet e përditshme dhe projektet që ata implementojnë, e me fokus të veçantë foli për shërbimet e ndryshme sociale dhe krijimin e hapësirave për Qendra Mësimore për fëmijët e komunitetit rom, ashkali dhe egjiptian.
Bulliqi ofroi mbështetjen e plotë për krijimin e hapësirave për avancim të të rinjve të komunitetit, dhe njëherit u zotua për bashkëpunim të mëtutjeshëm me qëllim të rritjes së shërbimeve dhe mirëqenies së grupeve të margjinalizuara në shoqëri.
Në takim ishte e pranishme këshilltarja politike për Çështje të Komuniteteve në zyrë të kryeministrit, Elizabeth Gowing, anëtarë të ekzekutivit dhe përfaqësues nga zyra komunale për Komunitete dhe Kthim.
