"Motër" nga Dorentina Imeri do ta hap programin garues të fIlmave të shkurtër në PriFest 15.
FIlmi i shkurtër "Motër", me regji dhe skenar të Dorentina Imerit, e tregon historinë e një familjeje shqiptare të Kosovës, gjegjësisht përpjekjet e tyre për të mbijetuar dhe për t'u integruar në Zvicër. Gjatë procesit, paaftësitë në mësimnxënie me të cilat ballafaqohet më e reja prej tyre paraqesin një barrë të shtuar për familjen. Prindërit nuk kanë kohë dhe para për ta mbështetur atë në shkollë. Motra e madhe, e cila vet është ende fëmijë, e merr përsipër këtë përgjegjësi, duke i anashkaluar nevojat e veta.
Në film luajnë Violeta Berisha dhe Arben Biba, ndërsa producente është Arzije Asani.
Dorentina Imeri u lind në 1993 si fëmijë i emigrantëve shqiptarë të Kosovës në Solothurn, Zvicër. Interesimi i saj për artin dhe teatrin e solli atë në botën e filmit. Në 2017, ajo filloi studimet baqellors në degën e filmit në Universitetin e Arteve në Cyrih (ZHdK). Në 2019, ajo e kreu një semestër në Shkollën e Teatrit Vizual (SVT) në Jerusalem si pjesë e studimeve të saj. Në 2022 diplomoi me fokus në shkrim skenari. Pastaj kreu një praktikë në Studime të Kinemasë në Institutin e Arteve Skenike dhe Filmit në ZHdK. Dokumentari i saj i parë i metrazhit të gjatë, MJEGULL, aktualisht është në fazën e post-produksionit.
"Motër" do ta hap garën e filmave të shkurtër në PriFest 15, duke shënuar fillimin e një programi të jashtëzakonshëm.
Edicioni i 15 i PriFest do të mbahet nga 12 deri më 17 shtator, duke ofruar një platformë ku filmbërësit dhe filmdashësit mund ta festojnë artin e kinematografisë dhe filmit.
The post Filmi “Motër” do ta hap programin garues të filmave të shkurtër në PriFest appeared first on Gazeta Express.
