Lirika e tij prej “shpirtit të gatuar me frymë dashurie”, mbetet simboli i pastër i gjuhës së dashurisë. Ai ishte shkrimtari, poeti, përkthyesi dhe mjeshtri i gjuhës shqipe, i cili, nuk bëri kurrë kompromis me artin e tij. Madje, vitet e fundit të jetës, origjinaliteti dhe karakteri i padiskutueshëm i krijimtarisë së tij letrare, i kushtoi deri edhe gjendjen jo të mirë ekonomike, kjo bashkuar me indiferentizmin e shtypit zyrtar të kohës.
Lasgush Poradeci e jetoi Rilindjen në periudhën e shpërthimit të kryengritjeve të mëdha për liri. Në veprën e këtij romantiku të fundit të letërsisë sonë jetoi shqetësimi atdhetar i mbrojtjes së kombit dhe të traditës së Rilindjes, ashtu sikurse edhe dëshira për triumfin e pikëpamjeve demokratike, shqetësimi për një emancipim të përgjithshëm kulturor e shpirtëror të shoqërisë shqiptare. Ai është nga lirikët tanë më të mëdhenj, i cili u shqua për sensibilitetin dhe ëmbëlsinë poetike me të cilën i këndoi Shqipërisë dhe dashurisë.
Sigurisht, është poeti shqiptar që dha një kontribut të vyer për gjuhën shqipe, krahas poetëve të tjerë të kohës. Njihet prirja e tij për arkaizmat dhe shprehjet popullore, po kaq sa edhe për fjalët e reja, këto krahas eksperimenteve leksikore për një amë të re.
Mitrush Kuteli e ka cilësuar si “Poeti i vetëm shqiptar që mendoi, foli dhe shkroi vetëm në gjuhën shqipe”./Hejza
The post Lasgushi kurrë nuk bëri kompromis me artin e tij appeared first on Gazeta Express.
