Kryeministri i Kosovës, Albin Kurti në mbledhjen e 154-të të Qeverisë foli edhe për letrën e politikanëve perëndimorë drejtuar ShBA-së, BE-së dhe Mbretërisë së bashkuar për qasje të barabartë ndaj Kosovës dhe Serbisë, shkruan Reporteri.net.
I pari i Qeverisë theksoi se në këtë letër është përfshirë edhe Ukraina.
“Këtë javë, të nderuar kolegë të kabinetit qeveritar e të dashur qytetarë, po ashtu pati edhe një zhvillim pozitiv për Republikën e Kosovës në rrafshin ndërkombëtar. Përmes një letre drejtuar Sekretarit të Shteteve të Bashkuara të Amerikës, Antony Blinken, Përfaqësuesit të Lartë të Bashkimit Europian për Politikë të Jashtme dhe Siguri, Josep Borrell dhe ministrit të Punëve të Jashtme të Mbretërisë së Bashkuar, Jamer Cleverly, mbi 50 deputetë, në mesin e tyre edhe senatorë e kongresistë amerikanë, 10 kryetarë të komisioneve parlamentare të politikave të jashtme të 16 shteteve, përfshirë edhe Ukrainën, kanë shprehur mbështetjen e tyre për Kosovën dhe kanë bërë thirrje për qasje më të ashpër ndaj Serbisë dhe rrezikut që veprimet e saj paraqesin për sigurinë e rajonin tonë”, tha Kurti në mbledhjen e Qeverisë.
Kreu i ekzekutivit gjithashtu falënderoi edhe të gjithë nënshkruesit, teksa shtoi se “e mirëpresim secilin nënshkrim dhe mbështetje të radhës”.
“Ky lloj i mbështetjes na e forcon përkushtimin tonë për de-eskalim të plotë të situatës në katër komunat në veri të Kosovës, angazhimin për demokraci dhe bindjen për ligjshmëri e kushtetutshmëri”, shtoi Kryeministri i vendit, Albin Kurti.
Ndryshe, në letrën e politikanët të vendeve të ndryshme perëndimor drejtuar SHBA-së, BE-së dhe Britanisë së Madhe thuhet se Perëndimi po ka qasje të butë ndaj Beogradit.
“Kosova është përballur me pasoja të rëndësishme pas përpjekjeve të kryetarëve të komunave për të hyrë në zyrat e tyre në veri të Kosovës. Kosova duhet të koordinohet me KFOR-in në të ardhmen për të parandaluar përshkallëzimin. Por mungesa e presionit të ushtruar ndaj Serbisë pas ndalimit arbitrar të tre policëve kosovarë dhe dështimi për të mbajtur përgjegjësi për sulmet ndaj KFOR-it, nxjerr në pah mungesën aktuale të paanshmërisë në adresimin e pikave të tilla të ndezjes”, thuhet në letrën e ekspertëve të politikës së jashtme drejtuar Përfaqësuesit të Lartë të BE-së për Punët e Jashtme, Josep Borrell, Sekretarit Amerikan të Shtetit, Anthony Blinken dhe ministrit të Jashtëm të Britanisë, James Cleverly.
Politikanët ndërkombëtarë kanë kërkuar që të kthehet ekuilibri dhe proporcionaliteti në marrëdhëniet me Kosovën dhe Serbinë.
Për shkak të zhvillimeve të fundit në komunat veriore, Bashkimi Evropian kishte vendosur masa sanksionuese vetëm ndaj Kosovës.
Qeveria ditë më parë ka kërkuar nga Bashkimi Evropian heqjen e masave ndëshkuese ndaj Kosovës, pas uljes së mëtejshme të prezencës së policisë në dhe rreth objekteve komunale./Reporteri.net/
<p>The post Letra për Kosovën drejtuar ShBA-së dhe BE-së, Kurti: Forcon përkushtimin tonë për de-eskalim të situatës në veri first appeared on Gazeta Online Reporteri.net.</p>
